𝐁𝐚𝐮𝐜𝐚𝐮 𝟐𝟏 𝐌𝐚𝐫𝐬𝐮 𝟐𝟎𝟐𝟒: Grupu Agrikultor Lao Buka Hasoru, organiza husi Asosiasaun dos Combatentes e Veteranos da Luta dé Libertasaun Nasional (ACVLLN) iha Suku Tiriloka, Postu Administrativu Baucau Vila, Agora daudauk Grupu Lao Buka Hasoru, iha membru na’in 9, ne’ebé halibur an iha ACVLLN nia mahon hodi hala’o sira nia atividade agrikultura.
Iha tinan 2023-2024 membru grupu la’o buka hasoru ho apoiu husi ACVLLN, organiza malu hodi kuda batar kuaze hektar 4 resin iha Suku Tiriloka. liu husi servisu makas ne’ebé grupu sira halo fó duni rezultadu ne’ebé di’ak, nune’e iha loron 19 Marsu 2024, Grupu sira hamutuk ho parseiru sira ne’ebé servisu hamutuk halo lansamentu ba kolleita batar ne’ebé grupu sira kuda.
Iha lansamentu kolleita batar ne’e partisipa husi koordenadór tékniku sekretariadu ACVLLN, Ekstensionista Suku, no membrus grupu sira ho nia família no komunidade sira iha Suku Triloka.
koordenadór grupu Ernesto da Silva, iha nia intervensaun molok halo kolleita ba batar hateten katak grupu ne’e ho membru grupu na’in 9 ne’ebé iha hetan apoiu ekipamentu hand tratór unidade ida no ekipamentu agríkola sira seluk husi ACVLLN, hodi fasilita servisu agríkola grupu nian.
“ho apoiu fasilidade ne’e mak iha tinan 2023, membru grupu sira kuda ona batar iha sira nia toos kuaze hektar 4 resin, Iha oportunidade ida ne’e koordenadór grupu agradese ba parte tomak ne’ebé apoiu ona grupu sira tantu ekipamentu husi governu liu husi ACVLLN no apoiu tékniku agríkola husi estensionista suku no tékniku husi ACVLLN.”tenik Ernesto
Iha oportunidade ne’ebé hanesan koordenadór tékniku sekretariadu ACVLLN, Julio da Costa Gaio, hato’o agradese wain ba GASC ne’ebé uluk SASCAS, apoiu ona fundus hodi fasilita kombatentes sira ne’ebé hala’o sira nia atividade agrikultura iha baze.
“ Ho hanoin ida katak liu husi apoiu fasilidade sira mezmu sei limitadu hela mais bele fasilita ita-nia kombatentes sira ho sira nia grupu sira bele hala’o sira nia atividade agríkola sai di’ak liu tan, nune’e bele iha produsaun ne’ebé sufisiente ba sira iha sira nia konsumu no mós bele hasa’e sira nia rendimentu ekonomia liu husi sira nia produsaun”.dehan Julio
Husi parte GASC ne’ebé reprezenta husi Rogerio Soares, apresia ho programa agrikultura ne’ebé implementa husi Grupu Lao Buka Hasoru, ne’ebé organiza husi ACVLLN.
“Ho fasilidade ne’ebé natoon bele fasilita ona Grupu Buka Moris hala’o sira nia atividade agrikultura ho di’ak, nune’e ohin loron ita halo lansamentu kolleita batar kuaze hektar 4 liu, nune’e husu ba grupu sira labele para iha ne’e de’it, la’ós kolleita tiha batar grupu sira fahe malu ona, maibé organiza malu di’ak liu tan ne’ebé agora hahú ho membru na’in 9 mai oin bele aumenta liu tan hodi bele hasa’e liu tan produsaun agríkola iha Triloka ne’ebé la’ós batar de’it maibé produtu potensiál seluk iha Triloka ne’e hanesan fore rai no produtu hortikultura sira.”tenik Rogerio
Liu tiha pasa liafuan badak husi koordenadór grupu, koordenadór tékniku sekretariadu ACVLLN no parte GASC, kontinua kedas lansa kolleita batar ne’e ho kondisaun maran no prontu ona atu kolleita. Nune’e ho kontente membru grupu ho nia família sira no komunidade sira ne’ebé partisipa iha eventu ne’e hahú halo kolleita ba batar. Remata *
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗲𝘀𝗶𝗮𝗹 M𝗲́𝗱𝗶𝗮 𝐆𝐀𝐒𝐂.
Editór notísia : Jonito Ronaldo