informasaun Media SASCAS data 18-04-2023: autoridade lokal suku Lauhata Munisipiu Liquica Sr. Daniel dos Santos Agradese ba SASCAS-PM nia atividade iha territóriu Timor-Leste laran tomak ne’ebé lori haksolok ba komunidade.
Aleinde ne’e Sr. Daniel dos Santos hateten, nudar autoridade lokál suku Lauhata agradese tebes ba iha SASCAS-PM ne’ebé maka apoia ona finanseiru ba iha CVTL hodi konstrui sintina públiku iha aldeia Raukasa(Aipelo) atu fasilita vizitante sira ne’ebé maka vizita situs turizmu iha Aipelo.
Entretantu Presidente Interinu CVTL hateten katak, fundus ne’ebé maka SASCAS-PM fó apoia ba iha CVTL daudauk ne’e konsege konstrui ona sintina Publiku iha Largo Lisidere, Aipelo, Behau, Flesa, ho nia objetivu maka oinsá bele fasilita komunidade sira atu sente konfortável bainhira hala’o viajen ruma.
Nia aumenta CVTL konstrui sintina Publiku iha Aipelo tanba konsidera fatin ne’e hanesan antigu Komarka portugeza nian, ne’ebé maka dadur ema husi Lauten ba to’o iha Oe-Cusse ne’ebé maka sira nia bei’ala sira mós fakar raan iha antigu komarka Aipelo.
Iha fatin hanesan Diretór Ezekutivu SASCAS-PM Sr. Edvin D. Soares Noronha hateten katak, SASCAS kada tinan sempre halo parseira ho sosiedade sivil sira hotu, inklui organizasaun autonomu sira.
Maski nune’e Sr. Edvin D. Soares Noronha akresenta katak, SASCAS halo parseiru ho CVTL konsege halo ona movimentu barak iha munisípiu 13 no daudauk ne’e iha munisípiu sira CVTL halo ona fatin deskansa nia iha munisípiu balun, oinsá maka bele buka rasik osan ho programa ida bolu BRO 𝘽𝙪𝙠𝙖 𝙧𝙖𝙨𝙞𝙠 𝙊𝙨𝙖𝙣.
Por enkuantu reprezentante Komandante PNTL Munisipiu Liquica hateten, nia parte sente haksolok tebes ba apoia sintina públiku ne’ebé maka konstrui husi CVTL no hetan finansiamentu masimu husi SASCAS.
Nia hateten sintina públiku importante tebes ba vizitante sira hodi vizita munisípiu Liquica atu hare fatin turístiku sira hodi hatama reseita ba munisípiu iha futuru oin mai.
Partisipa iha serimónia lansamentu ne’e maka, reprezentante sekretáriu estadu Arte é Kultura, F-FDTL, PNTL, Eis administradór Postu Bazartete, BTL, CVTL, komunidade kuaze ema na’in 135 𝑅𝑒𝑚𝑎𝑡𝑎*
𝐼𝑛𝑓𝑜𝑟𝑚𝑎𝑠𝑎𝑢𝑛 𝑂𝑓𝑖𝑠𝑖𝑎́𝑙 ℎ𝑢𝑠𝑖 𝑀𝑒́𝑑𝑖𝑎 𝑆𝐴𝑆𝐶𝐴𝑆-𝑃𝑀