𝐃𝐢𝐥𝐢 𝟐7 𝐟𝐞𝐯𝐞𝐫𝐞𝐢𝐫𝐮 𝟐𝟎𝟐𝟒: Asosiasaun Chega Ba Ita (sigla ACbit) hala’o treinamentu durante loron 3 ,ba ema na’in 30 ne’ebé maka mai husi munisípiu 10 maka hanesan munisípiu Buacau, Manatutu, Lauten, Ainaro, Likisa, Bobonaro Aileu, Ermera, Oe-Cusse, no Covalima.
atividade formasaun kona ba Hasa’e Koñesimentu Dinamizadora ne’e abertura husi Koordenadór Gabinete Apoia Sosiedade Sivíl Eng. Joaquin da Costa Freitas iha salaun HAK farol Dili.
Liu husi diskursu badak Diretóra ACbit Maria Manuela Leong Pereira hateten katak, nia parte agradese ba apoia husi Gabinete Sosiedade Sivíl nia ne’ebé maka mai iha tinan kotuk, no treinamentu ida ne’e atu hasa’e koñesimentu ba Dinamizadora sira ne’ebé maka hala’o ona ba faze daruak nia.
Aleinde ne’e Maria Manuela Leong Pereira afirma liu tan katak, treinamentu faze dahuluk hala’o ona ba ema na’in 40 ne’ebé maka daudauk ne’e hala’o sira nia knaar hanesan membru asosiasaun vítima iha munisípiu 13, oinsá atu sai fonte, tilun, ibun ba asuntu sira ne’ebé maka sobrevivente sira hetan iha munisípiu 12 inklui RAEOA.
“formasaun ka treinamentu ne’e atu hasa’e kapasidade ba feto maluk sira sai hanesan ami nia programa ne’ebé importante, depois de tinan barak ami servisu ho sobrevivente sira, maibé saida maka ita hare realidade sobrevivente sira barak maka idade avansadu ona no barak maka kondisaun saúde ladi’ak, entaun ita hare katak importante ita halo mudansa ba maluk feto sira”.tenik Maria Manuela Leong Pereira.
Iha fatin hanesan liu husi abertura ba formasaun ne’e Koordenadór Gabinete Apoia Sosiedade Sivíl Eng. Joaquin da Costa Freitas hateten katak, hare husi dimensaun dinámika sosiál dala ruma vítima sira ne’e komesa tama ona iha idade 60, no balun 70, no organizasaun ida ne’e sei tau matan nafatin ba vítima dala ruma susar oituan tanba númeru feto ki’ik.
“entaun bele mós tau atensaun ba sobrevivente ne’ebé sira ne’e hatutan fali vítima ida uluk, para depois memória ne’e labele mate, ida ne’e maka importánsia ba iha ACbit nia servisu”.tenik Eng. Joaquin da Costa Freitas.
Aleinde ne’e Eng. Joaquin da Costa Freitas aumenta liu tan katak, tempu ohin loron importante ba jerasaun ida agora maka tenke responsabilidade, tanba ne’e formasaun la’ós atu sai ativista di’ak ida maibé matéria sira ne’ebé maka partisipante sira hetan ne’e bele kontribui ba imi-nia koñesimentu hodi buka moris iha futuru.
“tik tok la fó benefísiu ba ita, ida ne’ebé ajuda ita ne’e maka aprende tau iha ita-nia ulun no oinsá ita atu transforma pensamentu ita-nia ulun ne’e ba asoens pozitivu ne’ebé fó benefísiu ba ita.” Eng. Joaquin da Costa Freitas.
Koordenadór GASC Eng. Joaquin da Costa Freitas aumenta nia parte espera formadu na’in 30 ne’ebé maka mai husi munisípiu ne’ebé diferente hanesan oportunidade hodi halo ligasaun ba malu atu aprende hamutuk. Remata *
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗲𝘀𝗶𝗮𝗹 Média 𝐆𝐀𝐒𝐂.
Editór notísia : Jonito Ronaldo