Informasaun Media SASCAS data 30-03-2023: Diretór Ezekutivu SASCAS-PM Sr. Edvin D. Soares Noronha hatuur ona fatuk dahuluk ba konstrusaun uma kreda foun Igreja Evangelica Asembleia dé Deus iha munisípiu Atauro ne’ebé maka hetan finansiamentu husi SASCAS-PM ho nia orsamentu US$.1,953,807.97.
Liu husi serimónia lansamentu ne’e pastór Apolionario Martins informa igreja asembleia dé deus ne’e buras iha munisípiu Atauro iha kedas tempu Portuguesa no partisipa mós iha luta ba libertasaun Nasionál hamutuk ho relijiaun sira seluk.
Enkuantu pastór Apolionario Martins komenta, agora dadaun relijiaun barak maka mai ona iha Timor-Leste, tanba ne’e presiza ema hotu nia servisu hamutuk atu la’o ba oin, tanba ne’e sarani sira agradese ba iha SASCAS-PM ne’ebé maka fó ona apoia orsamentu tanba ne’e hanesan grasa ida.
Iha fatin hanesan Administrador Munisipiu Atauro Sr. Domingos Soares komenta katak, VIII Governu ne’ebé lidera husi sua exelénsia primeiru Ministru Jeneral Sr. Taur Matan Ruak liu husi SASCAS-PM haraik ona grasa ba sarani igreja evanjélika asembleia dé Deus, no serimónia fatuk dahuluk ne’e hanesan grasa ida oinsá maka halibur sarani hotu atu kuda domin iha fuan.
Entretantu diretór ezekutivu SASCAS-PM Sr. Edvin D. Soares Noronha hatutan katak, nia parte agradese ba sarani Atauro ne’ebé ho pasiénsia hein prosesu hotu ba konstrusaun uma Kreda kongregasaun lokál Jerusalen.
Aleinde ne’e Sr. Edvin D. Soares Noronha konfesa, nia parte mós apresia tebes ba disponibilidade kompañia FU Xin ne’ebé maka hakarak hela tan tinan 2 iha Atauro hodi halo konstrusaun uma kreda ba sarani sira inklui kompañia Konsultan,ne’ebé maka ho pasiénsia tebes lori prosesu naruk hahú husi levantamentu dadus to’o mai iha dezeña ne’ebé adekuadu no hetan apresiasaun husi Obras Publiku no tékniku ADN.
Atu informa katak, partisipa iha lansamentu fatuk dahuluk ba uma kreda kongregasaun lokál Jerusalen iha Suku Beloi maka administradór Munisipiu Atauro, Komadante PNTL Eskuadra, F-FDTL, Polisia marítima, autoridade lokál, pastór inklui sarani sira kuaze ema na’in 400 resin. Remata.
Informasaun Ofesial husi Media SASCAS-PM