𝐈𝐧𝐟𝐨𝐫𝐦𝐚𝐬𝐚𝐮𝐧 𝗠𝗲𝗱𝗶𝗮 𝗦𝗔𝗦𝗖𝗔𝗦 𝗱𝗮𝘁𝗮 30-𝟏𝟏-𝟮𝟬𝟮𝟯: kinta feira semana ne’e ekipa komisaun organizadóra diálogu nasionál ho administradór postu Turiskai, xefe gabinete administrasaun munisípiu Manufahi ho liña ministérial deside atividade diálogu hala’o iha Pouzada Turiskai.
Enkuantu antes ne’e ekipa komisaun organizadóra diálogu nasionál hili fatin rua maka suku Mindelo no pouzada Turiskai, hare ba iklima udan ne’ebé iha maka deside hala’o de’it iha pouzada Turiskai depois maka kontinua la’o ain ba suku Mindelo hodi ba hare saudozu Presidente Repúblika Nicolao Lobato nia mate fatin hodi tau ai-funan.
Tuir Prezidente komisaun organizadóra Tito Ximenes katak, diálogu nasionál ne’e atu promove konstrutivu rezultadu ne’ebé sosiedade sivíl hetan hodi aprezenta ba iha governu no komunidade sira mós bele hato’o sira nia preokupasaun ba membru governu.
Nia aumenta diálogu nasionál ne’e parte ida atu promove Primeiru Prezidente Repúblika Saudozu Francisco Xavier dó Amaral nia moris fatin inklui promove mós segundu Prezidente Repúblika Saudozu Nicolao Lobato nia mate fatin nune’e jerasaun ba jerasaun bele hatene nafatin.
Iha fatin hanesan administradór postu Turiskai Adriano da Costa hateten, diálogu nasionál ne’e maka hala’o iha tempu bailoron nia parte propoin hala’o iha suku Mindelo maibé tanba udan entaun hala’o de’it iha pouzada Turiskai, tanba iha suku Mindelo tempu udan karreta susar atu ba tanba mota rua maka satán hela.
Administradór Postu Turiskai Adriano da Costa aumenta parte IGE mós prezensa melhora Estrada husi Same Mindelo no Turiskai Mindelo nune’e bele fó mós oportunidade ba komunidade sira ne’ebé maka hakarak ba vizita fatin ikus Saudozu Nikolao Lobato nia mate.
iha biban ne’e Diretór Adjuntu Subvensaun Publika Isaias Soares Guterres aumenta, atividade diálogu nasionál ne’e liga diretamente ba povu hodi hato’o sira nia preokupasaun ,ba iha governu oinsá maka bele buka solusaun no diálogu ne’e rasik sei marka prezensa husi vise Primeiru Ministru.
Maske nune’e Isaias Soares Guterres afirma, diálogu ne’ebé maka antes hala’o iha postu Quelicai área Uaibitai no Loelaku minisipiu Bobonaro daudauk ne’e iha ona Estrada, bee moos no no liña eletrisidade.
Rekorda katak atividade diálogu nasionál ne’e sei hala’o iha loron 16 dezembru 2023 maibé antes 14 to’o 15 sei iha eventu feira produtu lokál, tratamentu saúde ba komunidade ne’ebé maka hala’o husi klínika Bairopite.
Atividade diálogu nasionál ne’e organiza husi FONGTIL no suporta finansiamentu husi Serviço dé Apoio à Sociedade Civil é Auditoria Social (sigla SASCAS. )REMATA*
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗶𝘀𝗶𝗮́𝗹 𝗛𝘂𝘀𝗶 MÉDIA SASCAS
𝘆𝗼𝘂𝗧𝘂𝗯𝗲: 𝗧𝘃 𝗼𝗻𝗹𝗶𝗻𝗲 𝗦𝗔𝗦𝗖𝗔𝗦
𝗘𝗱𝗶𝘁𝗼́𝗿 𝗡𝗲𝘄𝘀 : 𝗝𝗼𝗻𝗶𝘁𝗼 𝗥𝗼𝗻𝗮𝗹𝗱𝗼 𝗱𝗲 𝗝𝗲𝘀𝘂s