𝐃𝐢𝐥𝐢 𝟎3 𝐚𝐛𝐫𝐢́𝐥 𝟐𝟎𝟐𝟒: kuarta feira semana ne’e ekipa koligasaun kompostu husi ONG Belun, CBRNTL, WWCTL, KSTL, HAK, FONGTIL no Rede feto aprezenta rezultadu peskiza ba Koordenadór Gabinete Apoio Sosiedade Sivíl(sigla GASC) Eng. Joaquim da Costa Freitas kona ba ONG nasionál menus kapasidade finanseiru atu kumpre lei traballu hodi garante direitu traballadór.
Liu husi aprezentasaunDdiretóra ONG WWCTL Rica Pasquela hateten katak, objetivu husi peskiza ne’e maka atu halibur informasaun ka esperiénsia kona ba organizasaun nia rekursu finanseiru hodi garante traballadór no oferese dadus adekuadu no kredivel ba parte governu no parseiru dezenvolvimentu atu mellora polítika no implementasaun apoio ba ONG sira.
Rica Pasquela komenta liu tan katak, metodolojia peskiza ne’e ninia rezultadu kolesaun perguntas/ pergunta xave sira nu’udar mata dalan hodi halo analiza kuantitativu ho nia perguntas xave 3.
Nia dehan ho rezultadu peskiza ne’ebe iha ekipa koligasaun rekomenda ba Gabinete Apoio Sosiedade Sivíl(sigla GASC) atu kobre kustu indireta ba apoio ONG sira no asegura instituisaun governu relevante sira atu kobre mós kustu indireta sira nia apoio finanseiru subvensaun ba ONG sira.
Iha fatin hanesan Koordenadór Gabinete Apoio Sosiedade Sivíl(sigla GASC) Eng Joaquim da Costa Freitas hateten nia parte apresia ho peskiza husi ekipa koligasaun nian, maibé presiza analiza didi’ak no hakerek ba iha livru ki’ik ruma hodi halo publikasaun no sai hanesan mata dalan ida.
“ha’u mós hanoin imi hotu nia envolvimentu ba iha peskiza boot ida iha tinan oin mai, kona ba ninia mekanizmu sei ko’alia iha tinan oin sera que ita ekipa ida de’it atu halo quisioner, intervista hirak ne’e ami bele lidera de’it maibé dadus mai husi imi depois maka ita elabora hamutuk”. dehan koordenadór GASC.
Eng Joaquim da Costa Freitas aumenta, preokupasaun sira ne’e iha tau iha konsiderasaun oinsá maka tau sira sai na’in ba organizasaun sira ne’e maka sira hakna’ar an ba. Remata *
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗲𝘀𝗶𝗮𝗹 M𝗲́𝗱𝗶𝗮 𝐆𝐀𝐒𝐂.
Editór notísia : Jonito Ronaldo