𝐃𝐢𝐥𝐢 𝟎𝟏 𝐌𝐚𝐫𝐬𝐮 𝟐𝟎𝟐𝟒: koordenadór Gabinete Apoia Sosiedade Sivíl (Sigla GASC) hamutuk ho amu parókia no autoridade Tiliomar nia hatuur ona fatuk dahuluk ba konstrusaun kapela Tiliomar munisípiu Covalima kinta feira semana ne’e(29/02/2024).
Antes lansamentu fatuk dahuluk ba kapela Tilomar ne’e, iha mós serimónia kulturál nian husi lia na’in sira.
Enkuantu iha lansamentu hatuur fatuk dahuluk ba konstrusaun kapela Tiliomar ne’e reprezentante Bispu Dioseze Maliana padre Sebas Coreia hateten katak, nia parte agradese ba apoia husi gabinete apoio sosiedade sivíl ba konstrusaun kapela Tiliomar.
Aleinde ne’e Padre Sebas Coreia ne’e aumenta liu tan katak, kapela Tiliomar ne’e hanesan misaun antigu ida ne’ebé maka hahú misionáriu iha fatin ne’e, tanba ne’e nia parte fó parabéns ba sarani Tiliomar no husu apoia sarani sira atu kolabora no servisu hamutuk ba konstrusaun kapela ne’e to remata.
Iha fatin hanesan Koordenadór Gabinete Apoia Sosiedade Sivíl (sigla GASC) Eng. Joaquim da Costa Freitas hateten katak, nia parte agradese ba sarani Tiliomar sira ne’ebé maka oferese ona rai ba konstrusaun kapela no governu sempre fó apoia.
Eng. Joaquim da Costa Freitas aumenta, konstrusaun kapela ne’e atu hametin fiar, tanba ne’e presiza prezensa sarani sira nia nune’e bele asegura obra ne’e to remata.
Enkuantu iha lansamentu ba Kapela ba Tilomar ne’e, marka prezensa husi reprezentante dioseze Maliana, Pe. Sebas Correia, atuál Pe. Parókia Suai, Pe. Parókia Salele, Administrador Postu Administrativu Tilomar, Komandante Eskuadra Salele, Reprezentante F-FDTL, Xefe Suku sira husi Postu Admistrativu Tilomar nian, Lia Nain sira no mós Komunidade no Sarani sira. Remata *
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗲𝘀𝗶𝗮𝗹 M𝗲́𝗱𝗶𝗮 𝐆𝐀𝐒𝐂.
Editór notísia : Jonito Ronaldo