𝐃𝐢𝐥𝐢 𝟎𝟐 𝐚𝐛𝐫𝐢́𝐥 𝟐𝟎𝟐𝟒: Koordenadór Gabinete Apoio Sosiedade Sivíl(siglas GASC) Eng. Joaquim da Costa Freitas tersa feira semana ne’e simu ona pose husi Vise Primeiru Ministru Eng. Mariano Asanami Sabino hodi hala’o knaar hanesan koordenadór iha GASC.
Liu husi Diskursu Koordenadór Gabinete Apoio Sosiedade Sivíl(siglas GASC) Eng. Joaquim da Costa Freitas hateten katak, bazeia ba dekretu lei no 17 ne’ebé maka publika iha 22 marsu 2024 hodi estabelese GASC hodi altera dekretu lei númeru 25 ne’ebé maka tau naran SASCAS.
Maske nune’e Eng. Joaquim da Costa Freitas afirma katak, IX governu konstitusionál rekoñese sosiedade sivíl sai parte determinante iha prosesu konstrusaun estadu no konsolidasaun demokrátiku Timor-Leste, no sosiedade sivíl moos sai komponente ida ba dezenvolvimentu pais.
Entretantu Koordenadór Gabinete Apoia Sosiedade Sivíl(siglas GASC) Eng. Joaquim da Costa Freitas afirma liu tan katak, gabinete ida ne’e nia servisu polítiku sentrál administrasaun direita ba estadu ho autonomia administrativu ho nia orsamentu anuál tuir programa no aprova iha parlamentu nasionál.
Eng. Joaquim da Costa Freitas hateten gabinete ida ne’e nia área apoia sira maka hanesan atividade relijiozu independente ba fee, atividade orden no kongregasaun katólika, sosiedade sivíl, asosiasaun, no Fundasaun.
Iha fatin hanesan Vise Primeiru Ministru MCAS é Ministru do Dezenvolvimentu Rurál e Habitasaun Komunitaria Eng. Mariano Asanami Sabino hateten katak, presiza haforsa liu tan ONG sira para depois bele foti rekursu ida to ba iha kraik , tanba ita hotu hatene ita-nia pais Repúblika Demokrátika Timor-Leste ninia estrutura iha kraik sei nafatin utiliza Sistema antigu nia.
“tanba ne’e edukasaun sívika ne’e atu eduka povu ida ne’e hanesan republikanu la’ós republikanu monarkia tanba ne’e ita-nia estrutura iha kraik ladún iha transforma signifika, tanba ita mantein estrutura ne’e iha kedas portugés nia tempu to mai iha Indonesia nia tempu kontinua uza tanba ne’e mentalidade monarkia kontinua la’o iha povu sira ne’ebé iha kraik tanba ne’e maka presiza edukasaun sívika hodi halo tratamentu iguál”.tenik Vise Primeiru Ministru.
Aleinde ne’e Vise Primeiru Ministru MCAS e Ministru dó Dezenvolvimentu Rurál e Habitasaun Komunitaria Eng. Mariano Asanami Sabino aumenta katak, funsaun sosiedade sivíl nia maka oinsá maka transforma sosiedade iha kraik ne’e bele la’o hanesan. Remata *
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗲𝘀𝗶𝗮𝗹 M𝗲́𝗱𝗶𝗮 𝐆𝐀𝐒𝐂.
Editór notísia : Jonito Ronaldo