Informasaun Media SASCAS data 28-08-2023:Segunda feira semana ne’e organizasaun sosiedade Sivil hamutuk 152 asina ona kontratu ho SASCAS hodi asesu ba fundus subvensaun publika, serimónia asina memorandum dé entendimentu entre governu ho parseiru estratéjiku ne’e partisipa diretamente husi Vice Primeiru Ministru Mariano Asanami Sabino.
Liu husi diskursu diretór ezekutivu SASCAS Sr. Edvin D. Soares Noronha hateten katak, SASCAS nu’udar servisu públiku ne’ebé antes ne’e tutela ba Primeiru Ministru ne’ebé parsial servisu hamutuk ho sosiedade sivíl atu garante ema hotu nia partisipasaun iha prosesu buka solusaun ba problema nasionál sira.
Sr. Edvin D. Soares Noronha akresenta katak katak, SASCAS nudar servisu públiku ho nia natureza jurídika nu’udar servisu públiku ne’ebé antes ne’e direita ba iha primeiru Ministru ne’ebé ho nia autonomia administrasaun no finanseiru haktuir iha dekreta lei no.25/2021, 17 novembru, ne’ebé maka agora daudauk iha programa no organika IX Governu Konstituisional tutela fali ba iha Vice Primeiru Ministru.
Entretantu Sr. Edvin D. Soares Noronha aumenta katak, SASCAS selebra nia MoU ne’e liu husi siklu 4 maka fase abertura ba vaga subvensaun Publika, anúnsiu abertura ba periode resesaun ba kandidatura, aprezenta ekipa nomeasaun ba komisaun permanente ba avaliasaun proposta no avaliasaun proposta ba preselesaun, asesmentu, selesaun finál, kontestasaun, negosiasaun inklui kontratu.
Aleinde ne’e Sr. Edvin D. Soares Noronha konfesa, jestór nia knaar servisu maka kontinua halo verifikasaun no monitoriza ba atividade tomak organizasaun sosiedade sivíl sira nia ne’ebé maka hetan fundus husi SASCAS atinji duni nia progresu ka lae.
Diretór ezekutivu FONGTIL Sr. Valentin Pinto hateten, aplikasaun proposta ba fundus subvesaun publika iha SASCAS ne’e nakloke tebes, tanba SASCAS envolve hotu liña ministériu sira hodi halo avaliasaun ba proposta 333 ne’ebé maka tama iha tinan 2023 ho volume ne’ebé makas tebes kompara ho tinan hirak liu ba.
Iha fatin hanesan Vice Primeiru Ministru sua exelénsia Eng. Mariano Asanami Sabino hateten katak, sosiedade sivíl nia ezisténsia ne’e importante tebes, atu hadi’a nasaun atu bele kompete no governu iha kompremetidu atu apoia Sistema edukasaun, saúde, Agrikultura no seluk tan ba iha dijitalizasaun.
“Tanba ita hatene katak, governu, sosiedade sivil, setor privadu nee elementu tolu neebe mak importante ba iha konstrusaun estadu,” dehan Visi Primeiru Ministru.
Iha biban nee, Vice PM hatutan, sosiedade sivil nia papel importante iha konstrusaun estadu, sosiedade sivil, setor privadu, governu, nee setor parseria ba malu, depedente ba malu, koopera malu liu liu ba konstrusaun estadu. 𝑅𝑒𝑚𝑎𝑡𝑎*
𝐼𝑛𝑓𝑜𝑟𝑚𝑎𝑠𝑎𝑢𝑛 𝑂𝑓𝑖𝑠𝑖𝑎́𝑙 ℎ𝑢𝑠𝑖 𝑀𝑒́𝑑𝑖𝑎