𝗜𝗻𝗳𝗼𝗿𝗺𝗮𝘀𝗮𝘂𝗻 𝗠𝗲𝗱𝗶𝗮 𝗦𝗔𝗦𝗖𝗔𝗦 𝗱𝗮𝘁𝗮 𝟮7-𝟬𝟵-𝟮𝟬𝟮𝟯; Tersa-feira loron 26/09/2023 semana ne’e reprezentante Visi Primeiru Ministru, Ministru Koordenadór Asuntus Sosiais No Ministru Dezenvolvimentu Rurál No Abitasaun Komunitária, Sr. Joaquim Freitas, hamutuk ho CMCLN, inaugura sentru hakiak no habokur karau iha Suku Ogues, Postu Administrativu Maucatar, Municipiu Covalima.
Programa hakiak no habokur karau ne’e implementa husi Grupo 12 de Outobru Foho Tetuk, ne’ebé estabelese husi CMCLN Municipio Covalima.
Enkuantu benefisiáriu husi programa ne’e, ema na’in 10 ne’ebé identifika husi CMCLN Municipio Covalima, mai husi veteranus sira ho grau 0a3 no 4a7, iha suku Ogues, Postu Maucatar.
Iha diskursu reprezentante, V-PM, Sr. Joaquim Freitas, nu’udar Kordenador sosiedade sivíl iha Gabineti V-PM, hateten katak programa ne’e di’ak ho objetivu hadi’a moris komunidade nian liuliu veteranus sira ho grau 0a3 no 4a7.
Sr. Joaquim Freitas aumenta nia parte husu ba grupu implementadór sira hodi tau atensaun ba kontinuasaun programa ne’e ba futuru hodi bele fo duni benefísiu ba grupu benefisiáriu sira.
Tuir Sr. Joaquim Freitas katak, atividade sira hanesan ne’e, inisiativa mai husi grupu benefisiáriu sira maka sei frekuénta ba oin maibé kuandu mai husi grupu implementadór mak tenke tau atensaun ba nia kontinuasaun ba oin.
Aleinde ne’e Sr. Joaquim Freitas afirma nia parte agradese ba Grupo 12 Outobru Foho Tetuk, ne’ebé organiza ona atividade ba grupu benefisiáriu sira no enkoraja liu tan komunidade no grupu sira labele ta’uk atu hala’o atividade sira ne’e ba beibeik no labele ta’uk halo sala nune’e bele halo duni buat ruma hodi hadi’a komunidade nia moris.
Iha inaugurasaun ne’e mós Kordenadora Grupo 12 dé Outobru Foho Tetuk, Sra. Pasquelia M. dos Reis Amaral, hateten katak benefisiáriu husi programa ne’e mai husi aman inan veteranus sira ho grau 0a3 no 4a7.
Nia aumenta Fundus ne’ebé apoiu ba grupu benefisiáriu sira hodi konstrui fatin hakiak karau no hola fini karau hodi hakiak no habokur iha fatin ne’e ho montante US $ 10,000.00.
Koordenadóra ne’e mós hatutan katak fini karau ne’ebé grupu benefisiáriu sira sosa lolos iha 15 maibé tanba kondisaun balun ne’ebé halo karau 3 mate no hela 12 ne’ebé entrega ba grupu benefisiáriu.
Fó hanoin mós katak orsamentu ho montante US $ 10,000.00 ne’ebé fó apoia ba Grupo 12 Outobru Foho Tetuk mai husi CCLN nia orsamentu ne’ebé maka tau ba iha SASCAS hodi halo administrativu.Remata*
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗶𝘀𝗶𝗮́𝗹 𝗛𝘂𝘀𝗶 𝗠𝗘́𝗗𝗜𝗔 𝗦𝗔𝗦𝗖𝗔𝗦
𝘆𝗼𝘂𝗧𝘂𝗯𝗲: 𝗧𝘃 𝗼𝗻𝗹𝗶𝗻𝗲 𝗦𝗔𝗦𝗖𝗔𝗦
𝗘𝗱𝗶𝘁𝗼́𝗿 𝗡𝗲𝘄𝘀 : 𝗝𝗼𝗻𝗶𝘁𝗼 𝗥𝗼𝗻𝗮𝗹𝗱𝗼 𝗱𝗲 𝗝𝗲𝘀𝘂𝘀