Informasaun Media SASCAS data 20-09-2023: kuarta feira semana ne’e diretór adjuntu subvensaun publika SASCAS Sr. Isaias Soares Guterres, pastór hamutuk ho autoridade postu no suku inaugura ona igreja evanjélika asembleia dé deus kongregasaun Atsabe ne’ebé maka harii husi sarani sira no kontinua apoia fundus husi SASCAS hodi finaliza obra refere.
Enkuantu liu husi intervensaun Abministrador Postu Atsabe Munisipiu Ermera Sr. Costancio da Silva hamutuk ho autoridade lokál sira hateten, dezenvolvimentu saida de’it maka la’o iha munisípiu Ermera parte autoridade lokál sempre fó apoia hodi lori dezenvolvimentu ne’e ba oin.
Aleinde ne’e Sr. Costancio da Silva hateten nia parte parte agradese ba SASCAS no Sarani IEAD kongregasaun Atsabe ne’ebé maka iha kolaborasaun di’ak no kontribui ba dezenvolvimentu hodi konstrui igreja ida ne’ebé maka ho kualidade di’ak.
Iha fatin hanesan Pastór Manuel Borges hateten, nia parte agradese tebes ba iha SASCAS nia kontribuisaun ba dezenvolvimentu sira iha Timor-leste ne’ebé maka la hare ba kór no rasa maibé sempre hamutuk komunidade sira hodi la husik ema ida iha kotuk.
Ba jornalista sira Diretór Adjuntu Subvensaun Publika Sr. Isaias Soares Guterres afirma konstrusaun igreja ne’e hanesan mahon ida ba sarani sira, atu hala’o sira nia orasaun ba maromak liu husi fatin ne’ebé diknu no igreja ne’e ninia benefisiáriu maka sarani sira iha Atsabe.
Sr. Isaias Soares Guterres aumenta orsamentu ne’ebé SASCAS fó apoia ba kongregasaun Atsebe ne’e fundus mai husi transferénsia subvensaun publika ne’ebé maka lidera husi VIII Governu Konstituisional, tanba ne’e sarani sira tenke kuidadu didi’ak obra ne’e ba tempu naruk.
Atu fó hanoin fila fali katak, igreja IEAD kongregasaun Atsabe ne’e harii husi Sarani sira maibé la konsege finaliza nune’e iha agostu 2022 SASCAS kontinua apoia fundus ho totál $.30.238,50 hodi kompleta no finaliza konstrusaun igreja IEAD kongregasaun Atsabe suku Parami Remata*
Informasaun Ofisiál Husi Média SASCAS
Editór News : Jonito Ronaldo de Jesus