𝐃𝐢𝐥𝐢 𝟎7 𝐌𝐚𝐫𝐬𝐮 𝟐𝟎𝟐𝟒: Koordenadór Gabinete Apoia Sosiedade Sivíl (sigla GASC) Eng. Joaquim da Costa Freitas hateten katak, GASC la halo rejistu ba organizasaun sosiedade sivíl maibé halo rejistu ba sosiedade sivíl ne’e knaar Ministériu Justisa nia hodi halo sosiedade sivíl sira nia baze legál nune’e sira bele sai hanesan organizasaun legál ida.
Eng. Joaquim da Costa Freitas aumenta katak, GASC nia knaar maka rejistu de’it proposta ne’ebé maka tama iha gabinete apoia sosiedade sivíl nia.
“ne’ebé to horiseik ne’e proposta ne’ebé tama iha ami nia fatin ne’e hamutuk 280 e iha tempu badak proposta sira sei lori ba halo selesaun, ekipa ida sei halo selesaun e selesaun ne’e mós sei envolve ministériu relevante sira para depois foti desizaun ba proposta sira ne’ebé maka tama e nune’e mós hanesan ohin ha’u hateten ona katak, ba oin hahú husi governu sosiedade sivíl hotu tenke aponta ba kualidade” dehan koordenadór GASC.
Maske nune’e Eng. Joaquim da Costa Freitas afirma katak, proposta ne’ebé iha sempre liga ba asosiasaun, fundasaun, asosiasaun konfesoens relijiozu, orden relijiozu, kongregasaun.
Aleinde ne’e koordenadór GASC aumenta katak, organizasaun rezisténsia konsidera sira hanesan mós organizasaun sosiedade sivíl hotu ne’ebé hotu-hotu tenke prienxe kritéria maka foin bele hetan apoia fundus husi governu.
koordenadór gabinete apoia sosiedade sivíl (sigla GASC) Eng. Joaquim da Costa Freitas afirma, proposta sira ne’e governu tau prioridade ba kategoria 4.
“kategorizasaun dahuluk maka hare ba organizasaun sosiedade sivíl sira ne’ebé maka ajuda governu hodi promove boa governasaun, segundu maka prioridade ba edukasaun sívika ka edukasaun sidadania atu sidadaun hotu hatene nia devér no nia direitu, terseiru maka hare ba iha empoderamentu komunitáriu maka organizasaun sosiedade sivíl sira iha baze, sira tenke hela iha baze bainhira hetan ona apoia hodi organiza no mobiliza komunidade iha dezenvolvimentu komunidade nia, no kategoria ba ikus nia maka iha orsamentu montante oituan para ajuda organizasaun sosiedade sivíl hodi reforsa sira nia an.” Dehan Eng. Joaquim da Costa Freitas Remata *
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗲𝘀𝗶𝗮𝗹 M𝗲́𝗱𝗶𝗮 𝐆𝐀𝐒𝐂.
Editór notísia : Jonito Ronaldo