𝐃𝐢𝐥𝐢 𝟐𝟑 𝐟𝐞𝐯𝐞𝐫𝐞𝐢𝐫𝐮 𝟐𝟎𝟐𝟒: sesta feira semana ne’e Timor-Leste Coalition Education (sigla TLCE) lansa relatóriu auditoria sosiál ba programa bolsa méritu 2022 nian ne’ebé maka hetan apoia fundus husi SASCAS iha tinan kotuk liu ba.
Enkuantu atividade lansa relatóriu auditoria sosiál ba programa balsa méritu 2022 ne’e ensera diretamente husi Koordenadór Apoia Sosiedade Sivíl (Sigla GASC) Eng. Joaquim da Costa Freitas iha Hotel Ramelau Comoro.
Ba jornalista sira Koordenadór Apoia Sosiedade Sivíl (Sigla GASC) Eng. Joaquim da Costa Freitas hateten katak, TLCE hanesan mós parseiru SASCAS nia ne’ebé maka liga ba programa auditoria sosiál.
“ami hanoin katak parseiru ida ne’e halo tia relatóriu ida ne’e, bele mós ba oin kontinua nafatin sai parseiru ba GASC, ne’ebé maka la’ós ona auditoria sosiál, maibé sei ko’alia liu kona ba boa governasaun, no espera katak sira nia intervensaun bele eduka ona povu ida ne’e iha kontestu boa governasaun no bele lori povu ida ne’e, tempu ida bele sai kontrola sosiál.” Dehan Eng. Joaquim da Costa Freitas
Enkuantu Eng. Joaquim da Costa Freitas aumenta tan katak, montante orsamentu ne’ebe fó apoia ba programa TLCE ne’e hamutuk 28 míl dolar amerikano ba programa ida foka ba auditoria sosiál ne’e.
Koordenadór Apoia Sosiedade Sivíl afirma katak, ba oin Gabinete Apoia Sosiedade Sivíl tau atensaun liu ba iha boa governasaun, katak organizasaun sira ne’ebé maka iha inisiativa atu fó edukasaun ba povu atu hatene kona ba boa governasaun.
“ apoia mós ba iha programa sira ne’ebé maka liga ba edukasaun sidadania, empoderamentu komunitáriu é fundus ida atu fó apoia ba organizasaun sira atu reforsa liu tan instituisaun sosiedade sivíl ne’e rasik”.tenik Eng. Joaquim da Costa Freitas.
Eng. Joaquim da Costa Freitas aumenta proposta ne’ebé maka daudauk ne’e tama iha Gabinete Apoia Sosiedade Sivíl hamutuk 280 proposta no iha tempu badak sei organiza hodi halo avaliasaun ba proposta sira ne’ebé merese atu hetan apoia fundus sira ne’e, liga ba programa edukasaun sívika, boa governasaun, empoderamentu komunitáriu, no reforsa instituisaun sosiedade sivil.
Partisipa iha lansamentu relatóriu auditoria sosiál ba programa bolsa méritu 2022, koordenadór GASC, diretór ezekutivu FONGTIL, diretór ezekutivu TLCE. Remata *
𝗜𝗻𝗳𝗼𝗿𝗺𝗮𝘀𝗮𝘂𝗻 𝗢𝗳𝗲𝘀𝗶𝗮𝗹 M𝗲́𝗱𝗶𝗮 𝐆𝐀𝐒𝐂.
Editór notísia : Jonito Ronaldo